♡♡ 我的遊記♡♡: Day 2.1 @ 岡山

2016年10月08日 / 星期六 (第二天)
07:41 ~ 08:36 | 特急はるか4 号 | 関西空港 → 新大阪 (自由席)
09:05 ~ 09:50 | 新幹線のぞみ5 号(N700 系) (博多行) | 新大阪 → 岡山 (自由席)
11:15 ~11:32 | 山陽本線普通(新見行) | 岡山 → 倉敷
15:36 ~15:53 | 山陽本線普通(岡山行) | 倉敷 → 岡山

(交通收費及詳細資料請往實際交通篇)
酒店：三井ガーデンホテル岡山

原本計劃坐巴士由関西空港直往岡山，價錢比起坐JR平一半，不過巴士最早開出班次都要8:45，而且車程需要三個鐘，差不多十二點幾一點先可到達岡山。盤算過後決定用金錢買時間，用雙陪價錢坐JR七點多就從機場出發往新大阪再轉新幹線往岡山。

離開関西空港前去睇吓酒店旁嘅休息室，有諗過喺哩到過夜慳返千幾蚊，但因B女同行，所以都係唔想太辛苦。

半夜應該瞓滿人，當日朝早七點多就已經大部份人離開了。

如果可以瞓到哩幾張大床仔都幾舒服啊！不過全場只有四張。

之前一直用JR Pass坐関西區嘅JR，但今次関西嘅Pass唔適合使用，所以直接喺售票機買票，不過最初只買到由関西空港至新大阪嘅普通車票，我哋想坐快車，搞咗輪最後問工作人員先再喺售票機買多一張特急劵合埋之前買嘅車票一齊入閘就可以乘坐Hakura特急快車自由席往新大阪。

到咗新大阪後唔需要出閘，攞住頭先嘅車票直接前往新幹線閘口前嘅票務處購買由新大阪至岡山新幹線嘅自由席，職員會收去之前関西空港至新大阪嘅車票而換一套関西空港至岡山嘅車票。

由於當日係長週未假期嘅第一天，新大阪新幹線各月台九點多已經濟滿人潮，往岡山列車嘅自由席喺較後嘅車廂，當到達適合嘅月台位置等車時，前面已經排滿咗起碼二十人，但如果選擇搭乘再下一班車的話要先返回大堂再往另一個月台，時間上係未必趕得切之餘亦好大機會同現在情況一樣，所以最後選擇原位等待。

好快列車駛入月台，自由席車廂內已經企滿人，我哋排喺龍尾跟本無可能上到車，人潮不斷迫入車廂，但真係太多人無辦法再迫入，突然聽到月台有廣播，跟住有好多人向前面指定席車廂跑過去，我聽唔明但大槪估到發生咩事，不過又不敢太魯莽，等到列車响起噹噹聲表示準備開出，月台職員向我哋揮手示意叫我哋盡快跑上前面指定席車廂，好彩最後都順利上到車。不過就迫到好似平時喺香港搭港鐵返工一樣。