10:05~10:15 | 酒店穿梭巴士 | 湖楽おんやど 富士吟景 → 河口湖駅 無料
11:20~12:26 | [普通]富士急行 | 河口湖→ 大月 1,140円
13:04~14:05 | [特急]かいじ110号 | 大月→ 新宿 (指定席) 2,970円
15:06~15:31 | JR 山手線(外回り) | 新宿 → 上野 200円
(交通收費及詳細資料請往實際交通篇)
酒店：上野ホテル丸谷
十點就到酒店大堂Check Out，跟住職員就安排我哋坐酒店嘅小巴前往河口湖車駅。
我之前預定坐十二點嘅火車離開，所以有兩個鐘喺車駅附近走走，但河口湖車駅係無咩地方可以參觀。所以喺車駅旁及車駅對面嘅手信店走走，買咗少少記念品影吓相後，就坐11:20開出嘅普通富士急行前往大月駅。
富士山真係好靚。
哩輛都係觀光巴士，比前一日坐嗰輛大少少。
車駅對面嘅平井売店。
影夠相，買夠嘢就去搭車，攞住個JR Kanto Pass 指吓個鼻就入得閘，車駅職員話三號月台，其實都係得一個月台之嘛！
喺車上陣網，瞓陣覺，個幾鐘好快就過。
去到大月駅，要上天橋到隔離月台坐JR列車返新宿
因為到步第一日已經喺JR Counter劃好咗指定席，所以到咗月台都唔使去排定隊。
喺JR月台望過去富士急行列車月台。
車嚟啦！
車廂唔滿
車程快，一個鐘車程就返到新宿嘞！先去酒店攞返行李再坐山手線前往上野。由於時間尚早，未到放工時間，所以上坐車時都唔多人。
四點前已經去到上野酒店，喺酒店抖咗陣就準備出去食嘢，當時已經四點幾，午飯時間過咗，晚飯時間又未到，咁食咩好呢！睇返資料，鰻割烹 伊豆栄係我目標之一，本來諗住走嗰日食晏就，查返店舖營業時間，原來無中場休息，於是就二話不說去哩到食嘞！
由酒店行過去都係十分鐘到，好方便啊！
鰻割烹・日本料理の専門店｜鰻割烹 伊豆栄（上野・永田町）
店舖樓高七層
係門口都睇到流晒口水啊！
當日因為唔係繁忙時間，所以被安排坐喺一樓。
餐廳對面喺上野公園內嘅不忍池，如果坐高幾層會見到成個池景咖！
睇吓食咩先！
最後揀咗伊豆榮弁当(刺身)
等咗陣終於有得食啦！有湯、漬物、刺身同主角鰻魚飯。
刺身好新鮮，嗰片尤魚比起朝早早餐嗰嚿彈牙好多！
條鰻魚真係好肥美，啲飯粒粒都好靚啊！
我記得之前去大阪嘅魚心壽司食咗件鰻魚壽司，好膩，之後好耐好耐都唔敢再食鰻魚，但今次原全無哩個感覺，淨係覺得啲魚肉好香好鬆化。真好好味啊！
食飽飽就去對面嘅上野公園不忍池行吓！啱啱黃昏時候，天色好美啊！
園內有一棵滿開嘅櫻花樹。
我無預期會見到櫻花，而家意外見到都幾開心啊！
喺公園行咗個圈，另一邊有幾棵滿開大棵啲嘅櫻花樹，但由於天色漸漸暗，影唔到相，所以諗住過兩日早啲再嚟睇過。
然後慢慢沿住アメ横商店街同埋上野中通り商店街「上中」行返酒店。
途經生果店就買咗少少生果當晚餐。
返到酒店，到浴場浸過大熱水，返到上房食埋啲水果就瞓覺，第二日又會離開東京前往輕井澤啊！
沒有留言:
張貼留言