♡♡ 我的遊記♡♡: Day 3.1 @ 河口湖駅、天上公園

沿住酒店直行到尾就可以去到新宿高速巴士駅。

五分鐘就已經可以行到街尾啦！

巴士中心喺京王百貨對面

BicCamera隔離

出發前已經喺香港網上訂票，攞住個e-mail就可以到有關窗口付款購票，我原本訂咗7:40開出嘅班次，但職員同我講我可以趕得切7:10開出嘅班次，問我提早好唔好，當然好啦！

買好車票就行出票務中心對出嘅26號巴士駅等上車。

因為當時已經7:05，所以車長已經安排緊上車。

對票上車

對號入座，巴士有九成滿啊！

兩個幾鐘嘅車程，坐定後好快就進入我嘅夢鄉。當瞓到睡眼惺忪望出窗外，嘩! Fuji San呀！當堂成個人醒晒！重見到富士急嘅過山車添啊！嚟過兩次都見你唔到，哩刻我嘅心情真係興奮到極點啊！

好快，唔使兩個鐘就已經到達我哋嘅目的地嘞！

觀光案內所喺巴士駅旁

裡面有好多河口湖、富士山嘅旅遊小冊子同入場優惠劵。

富士山清晰咁出現喺車駅後面啊！

車駅旁有一節舊火車

先到車駅裡面購買觀光巴士兩日劵。

哩個兩日劵幾特別，佢用Postcard形式設計，用完後可以將佢寄返屋企啊！

搞掂好晒就出去車駅旁嘅巴士駅等巴士前往天上公園

就係哩輛小小嘅觀光巴士，車仔細細，遊客不少，所以佢成日都常滿咖！

搭咗十幾個駅就到咗遊覧船・ロープウェイ入口。落咗車行上斜路就係纜車駅入口。

如果將我哋嘅隨身行李放喺河口湖車駅Locker的話，我玩完要坐車返出去車駅攞行李，所以為咗慳時間，我攞埋啲嘢去纜車駅。因為我出發前已查過哩到會有Locker放行李。

雖然數量唔多，但都有幾個比較大嘅Locker夠放我哋嘅行李，放底晒所有包伏就可以好輕鬆咁上山去。

買張來回票先

啱啱好買完票就可以上車啦！

幾分鐘就已經上到山頂啦！

風景好靚啊！重有個藍天，個天今次對我都算係咁啊！

好靚好清晰嘅富士山啊！見到佢嘅時候真係好感動啊！我第一次去日本就跟團去山中湖，但見過佢一眼就被雲遮咗，兩日都見唔到佢再出現，前幾年第一次自遊行嚟日本去箱根遊蘆之湖，我連富士山條尾都見唔到，三日都烏雲密佈，今次我終於可以清清楚楚同佢碰面啦！

影過不停呀！遠啲一張。

拉近啲又一張

哩隻兔子與貍貓做型好可愛，喺天上公園嘅焦點之一，係一個日本童話故事嘅主人翁，但原來哩個故事一啲都唔可愛，重有啲恐佈添啊！

(文章來自：山梨縣旅遊信息)

河口湖的天上山公園（カチカチ山）便是以此童話故事為背景的景點。

在那貍貓害死了好心收留它的老夫婦中的老婆婆後、便逃跑了、好在有一隻聰明兔用計為老夫婦報了一劍之仇。故事裡的聰明兔在最後用石頭點火、並趁貍貓不注意時丟進他的揹籃裡、火苗越燒越旺最後終於把狡猾的貍貓給燒死了。點火時石頭與石頭碰擊所發出的聲音就是『喀擦喀擦＝カチカチ』這也是天上山公園カチカチ山之名的由來。