2014年9月24日 星期三

Day 4.2 貴志駅/和歌山往難波

2014年5月21日 雨天/晴天
09:44~10:15 | [和歌山電鐵 - 玩具電車] 和歌山 →貴志
12:25~12:54 | [普通和歌山電鐵] 貴志 → 和歌山
14:14~15:02 | [紀州路快速 ] 和歌山 → 新今宮
15:52~15:54 | [普通]南海本線] 新今宮 →難波
(交通收費及詳細資料請往交通篇)
酒店:なんばオリエンタルホテル

得到司機嘅幫忙,幾個字後我哋就到達貴志車駅。

車駅外貌係貓貓樣,之前貴志駅只係一個簡陋嘅車駅,近年因為小玉站長而成為和歌山著名景點賺到錢嘅和歌山電鉄就將車駅重修成今日嘅面貌。





車駅旁嘅咖啡館剛啱遇上逢星期三休息日休館,所以就到隔離手信店逛逛。


買吓手信、影吓相,寫吓明信片,吸吓印仔之後都差啲忘記咗回程時間!





本來睇時刻表回程嘅係士多啤利列車,但到達月台時只停咗班普通列車,我哋都已經遲咗入月台,車長已經吹晒銀雞準備開車,當時都唔考慮係咩車種就快快跳入車廂,因為走咗車又要等半個鐘先會有車啊!


成個車廂都無咩人啊!

是日小玉車停駛,見到佢停咗喺車廠裡面,叫做有緣見到佢真身一面啊!

原來輛士多啤利列車都一樣喺車廠裡面,咁哩日咪淨係得玩具列車行使囉!

返到和歌山車駅本想打算先食晏,但商場內好似搵唔到有咩啱食嘅餐廳,但返到難波先食又好似太晏,所以決定去商場地庫嘅超市買嘢食,其實之前同大笨蛋、B女都好鐘意喺超市買嘢食,價錢唔貴又多選擇。

大家都好興奮揀自己想食嘅嘢,一於嚟個「瘋狂購物」。


一輪「瘋狂購物」後就叫三寶喺車駅等我哋,我哋三個去酒店攞返啲行李。無佢哋三個同行,大家步伐都特別快,來回都係用咗三個字就返到車駅同佢哋會合上車返難波嘞!


表妹話好想喺火車食便當好耐,今次終於得賞所願喎!

行程嚟到哩到,我今次旅程主要嘅白濱、和歌山行程就告一段落啦!嚟緊幾日只係滿足未到過關西嘅姨媽同亞姨,跟住嘅地方我同大笨蛋都係舊地重遊咋!


四點前已經順利返到難波,由於表妹第二日就要獨自離隊返港,所以我專登喺返難波時揀搭南海電鐵,可以順道話佢知離開時坐咩車同上車位置。我見議佢坐關西空港Rapi:t,咁就一定無撞板啦!

 跟住地圖都可以收埋,全無難度就由難波車駅前往東方難波酒店。


 Check in 後照舊三寶留房休息,我哋返到難波就緊係唔會留自己喺房咁傻啦!我之前見到有人到訪過難波八阪神社,神社內有個獅子舞台,佢嘅外型好似一隻獅子咁幾得意,嚟幾次都未去過,所以今次就走訪一下。


以我哋嘅步行速度,由東方難波酒店行過去都要半個鐘呀!點知當我興致勃勃去到時,眼前竟然係一道高高嘅棚架,吓!唔係呀!維修工程進行中…… 我直情想喊出嚟呀!







唉!人算不如天算,咁唯有去shopping啦!

瘋狂購物咗一輪之後,對腳已經唔係自己咁啦!表妹重好有衝力繼續行,大笨蛋同我頂唔住要返酒店抖抖先,之後就帶三寶到心齋橋一帶走走,睇吓第五代固力果先生,佢將會喺心齋橋消失啊!(第六代固力果先生已經喺2014年10月23日重新展視喺戎橋上!)



第五代固力果先生

第六代固力果先生


由於表妹第二日就自己返香港,所以哩餐食豐富啲!其實佢走唔走我都係plan咗去魚心


魚心比我上兩次嚟嘅時候有好大分別,舖頭啲人對我哋哩啲中國籍嘅遊客好冷漠。態度都麻麻。 不過啲食物一樣咁好味!

啲海膽鮮甜都難以用筆墨形容呀!

鵝肝壽司,入口即溶,正!

熟蝦壽司,OK啦!

肥味帶子

拖羅,都係入口即溶,完全唔使咬咖!

賴尿蝦就一般。

哩個表妹話好新鮮,粒粒都卜卜聲。

哩個一蝦兩食,蝦肉好彈口,蝦頭炸都脆脆,好好味呀!


 

食飽後用緩慢嘅腳步慢慢散步返酒店,表妹繼續佢嘅血拼,我同大笨蛋就宣佈投降,早啲返房瞓吧!橫掂最後兩日都會喺哩頭,到時先再血拼吧








沒有留言:

張貼留言