2014年9月21日 星期日

Day 3.4 :晚餐@和歌山

2014年5月20日 晴天/雨天
09:50~10:10 | [白浜温泉無料シャトルバス] 南浜千鳥の湯 海舟 → 白浜駅
10:28~11:48 | [特急]くろしお14号 白浜 → 和歌山
12:06~12:16 | [和歌山市内バス] 新內→ 公園前
15:30~15:40 | [和歌山市内バス] 公園前 → 新內
(交通收費及詳細資料請往交通篇)
酒店:天然温泉 紀州の湯 ドーミーインPREMIUM和歌山

同表妹「分手」後,我哋坐返巴士返酒店,真係好好彩,一返到酒店後就開始落雨,雨勢重越落越大。

酒店Check in時先諗起唔記得問表妹攞passport,唯有後補啦!但職員話我只係訂咗兩間隻人房一間單人房,因為表妹之前未確實係咪同我哋同行,所以哩個訂房應該係最初訂,但後來改咗不過酒店好似收唔到,好彩櫃台哩位職員先生啲英文可以同我溝通到,所以都順利換返三間雙人房,其實雙人同單人分別在放多份用品,房嘅大小同設計跟本就一樣。

本來我同大笨蛋諗住安頓好三寶後就到和歌山車駅內嘅商場逛逛,但落起大雨,再加上自己都有啲攰,都係唔好四處走啦,於是就去咗浸溫泉抖一抖,哩次行程每一日都好早就返酒呀!

浸完溫泉成個人鬆晒,鬆晒就當然想瞓啦!

到六點幾我自己打算走出街行行睇吓有咩食,但外面落住好大嘅雨,刮起好大嘅風,我著唔夠衫都唔敢行出去,就喺哩個時間見到表妹返嚟啦!佢返嚟時已經探咗路睇過有啲咩餐廳啱三寶食,商量好後就帶佢哋去前一條街嘅小小店舖開餐啦!

哩條係和歌山市嘅商店街,不過無咩嘢賣啊!

就喺哩間舖頭解決我哋晚餐嘞!

舖面細細,但好似平時睇日劇見到啲小店呀!

因為大家都唔係好餓,所以六個人只係叫咗三分食物,其實我都覺得有啲唔係幾好意思,但又唔想叫咗食唔晒咁嘥嘢,唯有唔好意思都做一次啦!

一個海鮮烏東

兩個蛋包飯

就係咁完成咗哩餐,不過個飯真係好好食,表妹同姨媽都話佢啲個烏東好好味啊!而且老板好好人好友善啊!所以雖然簡簡單單,但都食得好開心啊!

食飽之後到對面便利店買聽日嘅早餐就返酒店啦!因為夜晚同晏就嘅溫差真係好大,再加上落雨又刮風,我自己都凍到口陣陣,如果凍親三寶就大件事,所以都係早啲打道回府穏陣啲。

返到酒店浸吓溫泉,拾吓嘢,就係咁又完成咗一日看似輕鬆但又令人好累嘅行程啊!當時好擔心第二日嘅天氣,因為摘士多啤利係戶外活動之餘,如果落到濕淋淋又點可以去摘呢!唯有祈禱,希望在明天。



沒有留言:

張貼留言