22/03/2010
今日嘅抽血報告終於全線合格,白血球指數重升到5.9添啊!所以順利批准聽日11:30打第五針啦!
今日哩個醫生係咁多個見過最正常嘅一個啊!一個有肚腩少少光頭嘅中年醫生,有問必答而且答案清澈,佢重好細心睇晒我嘅case之後話如果我打完晒六針先去排期做電療的話要等六至七個星期先可以開始做,所以佢就幫我寫紙叫我今日就攞去排定先,咁就可以慳返啲時間,到時一完晒化療,就可以好快咁開始做電療嘞!佢真係諗得週到啊!
由於今日公司有啲要事做,所以朝早抽完血就返咗上公司一轉,見返多月冇見嘅同事,大家嚟個擁抱,佢哋送上一連串嘅祝福、慰問,真係令我好開心同窩心啊!重有位靚太同事專登留起啲利是比我啊!繼上次喺街遇到老闆比利是,今日又有利是逗,真係利利是是,唔通今日咁順利就係袋住四封利是??!!哈...哈!咁我下次覆診打最後一針時我都袋晒哩四封利是去先得啊!
23/03/2010
今日順利完成咗第五針啦!即係重有一針咋!真係想快啲可以打埋佢啊!
今日哩姑娘手勢嘛嘛!竟然搵條最幼嘅血管插落去,唉!緊係唔得啦!痛餐死咪又係拮返上次個位。
哩啲自費嘅貴藥水係透明啊!唔係之前咁粉紅色,感覺上好似冇咁嘔心啊!
完成咗吊針就打多枝鹽水針就大功告成,可以返得屋企開始做一條死魚嘞!